என் விழியும் தமிழ் மொழியும் விற்பனைக்கு...!

என் விழிகள் விற்பனைக்கு

என் இதயத்தோடு

தொடர்பில் இருந்து

என்றும் உனைக்காண

ஏங்கித்துடிக்கின்றது

ஆதலால் என் விழிகள்

விற்பனைக்கு...!!!

**************************

என் மொழிகள் விற்பனைக்கு

நான் ஒரு கோழை

என்னால் பேசப்படுவதால்

என்றும் அடிமையாகவே உயிர்வாழ்கிறது

அதற்கு நிரந்தர விடுதலை வேண்டும்

வீரநெஞ்சம் கொண்டவர்களுக்காய்

என் மொழிகள் விற்பனைக்கு...!!!

*******************

என் யன்னல் நிலவு விற்பனைக்கு

தோழியாய் நினைத்து

காதல் செய்திபேச

காதலி யாருமில்லை

காத்திருக்கும் நிலவும்

தேய்ந்துபோவது நியாயமில்லை

ஆதலால் என் யன்னல் நிலவு

விற்பனைக்கு...!!!

************************

என் ஆண்மை விற்பனைக்கு

உயிர்தந்த உறவுக்கும்

உயிர்கொடுக்கும் உறவுக்கும்

உடன்பிறந்த உறவுக்கும்

உடன்பிறவா உறவுக்கும்

ஒன்றும் செய்திருக்கவில்லை

ஆகவே என் ஆண்மை விற்பனைக்கு...!!!

************************

என் முற்றத்து மல்லிகை விற்பனைக்கு

முகர்ந்து பார்த்திடவும்

மூச்சின்றி தவிக்கின்றேன்

முன்பனியில் நனைந்தும்

சுடும்வெயிலில் வாடியும்

வாசமற்றுப் போகும்முன்

என் முற்றத்து மல்லிகை

விற்பனைக்கு...!!!

**************************

என் கற்பனைகள் விற்பனைக்கு

தாய்மொழி என்றும்

தமிழ்மொழி பயின்றும்

வாய்மொழி இருந்தும்

ஒருவரி கவி எழுதிட நேரமில்லை

ஆதலால் என் கற்பனைகள்

விற்பனைக்கு...!!!

************************

ஏதும் குற்றம் குறை இருந்தால் கருத்துக்ளில் சொல்லிவிடுங்கள் அப்படியே உங்கள் வாக்கையும் இன்ன்டுச்செல்லுங்கள்.

நட்புடன்,

நா.நிரோஷ்.